«SPK Astana Development» ЖШС Басқарма төрағасының орынбасары Ералы Оралов және «QazTrade» сауда саясатын дамыту орталығы» АҚ Бас директорының орынбасары Әсел Егембердиева Астана қаласының MICE-индустриясын дамытуға бағытталған ынтымақтастық туралы келісімге қол қойды.
Құжатқа сәйкес тараптар қажетті ақпаратпен алмасуды, сондай-ақ Елордада инвестициялар тарту және бизнесті дамыту жөніндегі жобаларға қатысуды жоспарлап отыр.
«Біздің компаниялардың қызметінде көптеген байланыс нүктелері бар. Күш-жігерімізді біріктіре отырып, біз Астана мен өңірлердің экономикалық белсенділігін ынталандыруға бағытталған, оның ішінде инвестициялар тарту және шағын және орта бизнесті дамыту арқылы бірлескен жобаларды ілгерілетіп, іске асыра аламыз», – деді Ералы Оралов.
Сондай-ақ, бірлескен күш-жігермен іскерлік іс-шаралар, өңірлік және халықаралық конференциялар мен бизнес-форумдар жоспарланып отырғаны атап өтілді.
«Біздің компанияның негізгі қызметі сыртқы нарықтарға экспортты ілгерілету болып табылады. Бизнеске арналған іс-шараларды біз шетелде де, Қазақстанда да өткіземіз. Сіздермен ынтымақтастық экспортқа бағдарланған қазақстандық кәсіпорындар үшін көбірек серіктестер тартуға көмектеседі, сондай-ақ Қазақстанда іскерлік туризмді дамытуға ықпал етеді», – деп атап өтті Әсел Егембердиева.