23-26 қарашада Astana Invest БАӘ компаниялары үшін таныстыру турын (FAM trip) өткізді. Оған Business Gate, Safeer Corporate Services Provider, EurAsia Gulf, Avantgarde Brand Services және Arabian MICE өкілдері шақырылды.
БАӘ делегациясы үшін елорданың негізгі MICE нысандары мен көрікті жерлеріне саяхат ұйымдастырылды, қаланың Конгресс мүмкіндіктері көрсетілді.
Таныстыру туры шеңберінде «Kazakh Tourism» ҰК» АҚ, жергілікті туризм ұйымдарының (ТКТ, GATS, Компас, Qtrip, Empire Travel Qazaqstan, Саят және Abdi travel) қатысуымен дөңгелек үстел өткізілді, оның барысында қатысушылар астананың ғана емес, бүкіл Қазақстанның туристік және инвестициялық әлеуетімен танысып, туристік ұсыныстар мен өнім туралы білді.
Кездесу барысында Astana Invest пен БАӘ MICE туризм өкілдері арасында туристік климатты жақсарту және елдеріміз арасындағы туристік ағындарды арттыру үшін ынтымақтастықты дамытуға бағытталған бірқатар меморандумдарға қол қойылды.
Құжат БАӘ туристерін Нұр-Сұлтан қаласына тарту, елорданы халықаралық деңгейде ілгерілету, сондай-ақ БАӘ іскерлік іс-шараларын ұйымдастырушылармен әріптестік қарым-қатынастар орнату бойынша бірлескен жобаларды, зерттеулер мен іс-шараларды өткізу сияқты ұзақ мерзімді стратегиялық мақсаттарды қамтиды.
Осылайша, Astana Invest елорданы заманауи және қарқынды дамып келе жатқан бағыт және Орталық Азиядағы ірі оқиғалар хабы ретінде көрсетуге ниетті.
