Тұңғыш республикалық ат марафон-бәйге

«Ұлы Дала Жорығы» – еліміздің 6 аймағын (Нұр-Сұлтан қаласы, Ақмола, Қарағанды, Ұлытау, Қызылорда, Түркістан облыстары) қамтитын тұңғыш жалпыреспубликалық ат марафоны.

Әлемдік тәжірибеде теңдесі жоқ бұл марафон Ұлы Даланы мекендеген көшпенді халықтың мұрасы ретінде шабандоз мәдениетін Қазақстан бренді ретінде қалыптастыруға негіз болады. Бұған қоса, марафон отандық туризм мен ұлттық спорт саласын дамытуға тың серпін береді.

Жобаның мақсаты - Қазақстанмен тікелей байланысты танымал бренд құру және ұлттық мәдениетті халықаралық аренада насихаттау, жастарды ұлттық мәдениет пен тарихты зерделеуге баулу, спорттағы шеберлік пен төзімділік құндылықтарын дарыту.

17 қыркүйекте Нұр-Сұлтан қаласының «Қазанат» ипподромында 100 шабандоздың қатысуымен марафонның салтанатты ашылуы болады.

18-29 қыркүйек аралығында марафоншылар елордадан Түркістан қаласына дейін 1200 шақырымнан аса қашықтықты басып өтеді.

Марафон 100 шақырымдық 12 сатыға бөлінген. Еліміздің әрбір өңірінен марафонға 1 командадан қатысады. Марафонға қатысушыларға Ұлы Дала рухын сезінуге және түркілердің киелі жерлері – Жошы хан, Алаша хан кесенелері, сондай-ақ Қазақ хандығының алғашқы астанасы Созақ қаласы пен түркі руханиятының бесігі Түркістан қаласы сияқты тарихи орындарға, Әзірет-Сұлтан кесенесіне зиярат жасауға мүмкіндік туады.

Соңғы меже – Түркістан қаласына дейін ең қысқа уақыт барлық команда құрамымен ішінде жеткен команда мүшелері бас жүлде – «Ұлы Дала Сарбазы» атағы мен 30 млн теңге көлеміндегі жүлдемен марапатталады. 2-ші және 3-ші орын иегерлері сәйкесінше 20 млн теңге және 15 млн теңге жүлделерімен марапатталады.

Жарыс барысында барлық қатысушылар демалыс орындары, азық-түлікпен және қажетті медициналық көмекпен қамтамасыз етіледі.

Бұдан бөлек, БАҚ өкілдері үшін марафон аясында арнайы «Ұлы Дала Жаршысы» көшпенділер пресс-туры өткізіледі. Іріктеуден өткен 10 қатысушы марафонның бағыты бойынша жүріп өтіп, Ұлы Даланың мәдени тұрмысына қанығады, Орталық және Оңтүстік Қазақстанның географиясы, экономикасы, топонимикасы т.б жайлы құнды ақпарат алады.

Марафон Қазақстан Республикасы Мәдениет және спорт министрлігі қолдауы және «The Great Steppe Tour» Қоғамдық қоры мен «Altyn Qyran Foundation» қоғамдық қорының ұйымдастыруымен өтеді. Жобаның бас демеушісі – Туризм индустриясы мен спортты қолдау қоры.

Марафонға қатысу үшін өтініштер qazanat.com сайты арқылы қабылданады.
 

Марафонды ұйымдастырушы - «The Great Steppe Tour» қоғамдық қоры мен «Altyn Qyran Foundation» қоғамдық қоры.

Үйлестіру жұмысы: ҚР Мәдениет және спорт министрлігі